ရှမ်းပြည်မြောက်ပိုင်း၊ ကျောက်မဲမြို့ဈေးအတွင်းရှိ ရွှေမိုးရွှေဆိုင်ကို ယမန်နေ့ (စက်တင်ဘာ ၁၂) က ဓားပြတိုက်သွားသူများနက် အဓိကတရားခံလွတ်မြောက်နေဆဲဖြစ်သည်ဟု ရွှေဆိုင်ပိုင်ရှင်က ပြောသည်။
“လိုင်းပေါ်မှာ သံသယခံမိသွားပြီ မိသွားပြီဆိုပြီး ပြောကြတဲ့ဟာပေါ့နော်။ အဲဒါ တရားခံ လုံးဝ မမိသေးပါဘူးရှင့်။ အဲဒါ အခု သံသယလူအဖြစ် ဖမ်းထားတဲ့ဟာလည်း အဲ သံသယလူပဲ ရှိသေးတယ်ပေါ့နော်။ တကယ် တရားခံက ကျန်သေးတယ်ပေါ့နော်။ အဲဒါ လုံးဝ မမိသေးပါဘူးရှင့်။ တော်ကြာနေ လွတ်သွားမှာစိုးလို့ပေါ့နော်။ အကယ်၍ အဲ.. တွေ့တဲ့လူ ရှိတယ်ဆိုလို့ရှိရင် အသက် ၂၀ ဝန်းကျင် ဝန်းကျင်မှ သူက… အသက် ၂၀ ဝန်းကျင်၊ အရပ်က ဘယ်လောက်လဲ၊ ၅ ပေ ဝန်းကျင်ပေါ့နော်။ အရပ်က ၅ ပေ ဝန်းကျင်၊ ပိန်ပိန်လေးနဲ့ အသက် ၂၀ ဝန်းကျင်၊ အသားလေးကတော့ ဖြူဖြူ ပေါ့နော်။ အဲဒါလေး အကယ်၍ သံသယလူအဖြစ် တွေ့မိတယ်ဆိုလို့ရှိရင် ညီမကို လာရောက်ပြီးတော့ ပြောပြပေးကြပါဦးရှင့်” ဟု ပြောထားသည်။
မြေပြင်သတင်းအရ ဖမ်းမိထားသူများမှာ ကျောက်မဲမြို့မှ ၂ မိုင်ခန့်အကွာ ကောင်းအက်ရွာတွင် နေထိုင်ဖူးသူများဖြစ်ပြီး လက်ရှိတွင် စစ်တပ်မှ စစ်မေးနေကြောင်း သိရသည်။
“မနေ့က တောင်နောက်မှာ မိတာ ၂ ဦးတဲ့၊ ပစ္စည်းတွေ မရသေးဘူး၊ ခုအတိုင်းဆို တစ်ယောက်လွတ်နေသေးတဲ့သဘောပဲ၊ မနေ့က အဲမိတဲ့ ဓားပြတွေကို ဆိုင်ရှေ့မှာ ဓါတ်ပုံရိုက်ပြီး အမှုကျူးလွန်ပုံကို ပြန်သရုပ်ပြခိုင်းတာရှိတယ်” ဟု ကျောက်မဲဒေသခံတစ်ဦးက ပြောသည်။
ယမန်နေ့က ရွှေဆိုင်ကို ဓားပြတိုက်သူမှာ သေနတ်ကိုင် လူ ၃ ဦးဖြစ်ပြီး ၎င်းတို့ပစ်ခတ်မှုကြောင့် ဆိုင်ရှင်နှင့် စည်ပင်ဝန်ထမ်းတစ်ဦး သေနတ်ဒဏ်ရာရရှိခဲ့ပြီး ရွှေ ၈၀ ကျပ်သားခန့်ကို လုယက်ယူဆောင်သွားခဲ့သည်။
ယင်းအမှုနှင့်ပတ်သက်၍ ရဲတပ်ဖွဲ့မှ သတင်းထုတ်ပြန်မှု မရှိသေးပေ။