၁၉၇၇ နှောင်းပိုင်းနဲ့ ၁၉၈၀ ဝန်းကျင်ကာလတွေကစလို့ ထင်ရှားခဲ့တဲ့ တေးရေး/တေးဆို တေးသံရှင် ကိုင်ဇာ (ခေါ် ) ဦးညီညီဝင်း ဟာ ရန်ကုန်မြို့ ဝိတိုရိယ ဆေးရုံမှာ ဆေးကုသမှုခံယူနေရင်း ဒီကနေ့ သြဂုတ် ၂၂ ရက် ညပိုင်းမှာ ကွယ်လွန်သွားပြီလို့ နီးစပ်တဲ့မိတ်ဆွေရင်းတချို့က အတည်ပြုပါတယ်။
ကွယ်လွန်ချိန်မှာ အသက် ၆၆ နှစ်ရှိပြီဖြစ်ပြီး အဆုတ်ထဲကိုပိုးဝင်တာကြောင့် အထူးကြပ်မတ်ကုသဆောင်မှာ ဆေးရုံတက်ရောက်ကုသမှုခံယူရင်း ကွယ်လွန်ခဲ့တာလို့ သိရှိရပါတယ်။
၁၉၇၇ ခုနှစ်က ”အကျည်းတန်၏ အထီးကျန်အတ္ထုပ္ပတ္တိ” တေးသီးချင်းခွေက စတင်လို့ အနမ်းပန်း၊ သီချင်းရှင်ကိုကြင်နာပါ၊ မနိုးပါစေနဲ့မိုးရယ်နဲ့ တူနှစ်ကိုယ်တိုင်းပြည်၊ ချမ်းလည်းချမ်းတယ် လွမ်းလည်းလွမ်းတယ် အစရှိတဲ့ နာမည်ကျော် ကိုယ်ပိုင်သံစဥ်တေးသီချင်းတွေ သီဆိုရေးသားသူ တေးသံရှင် ကိုင်ဇာဟာ တေးသီချင်းခွေပေါင်း မြောက်များစွာ ထွက်ရှိထားသူ ဖြစ်ပြီး ဒီကနေ့အချိန်အထိ လူငယ်၊ လူကြီးအားလုံး ကြိုက်နှစ်သက်တဲ့ တေးသံရှင်ဖြစ်ပါတယ်။
သူ့ရဲ့ ကစ္ဆပနဒီလှိုင်းသံ တေးစီးရီးဟာ ၁၉၈၀ ဝန်းကျင်မှာ ထင်ရှားခဲ့တဲ့ တေးစီးရီးတစ်ခုဖြစ်ပြီး “တူနှစ်ကိုယ်တိုင်းပြည်” သီချင်းကတော့ ဒီကနေ့အထိ ထင်ရှားကျော်ကြားလူကြိုက်များနေတဲ့ တေးသီချင်းတွေ ဖြစ်ပါတယ်။
တေးသံရှင်ကိုင်ဇာနဲ့ ထင်ရှားအမျိုးသမီးတေးသံရှင်တွေဖြစ်တဲ့ မေဆွိ၊ မေခလာ တို့ အတူသီဆိုကြတဲ့ စုံတွဲတေးသီချင်းတွေကလည်း ဒီကနေ့အထိ ပရိသတ်တွေကြား ဆယ်စုနှစ်များစွာကြာတိုင်အောင် အမှတ်ရထင်ရှားနေဆဲဖြစ်ပါတယ်။
လက်ရှိမှာ စျာပနရက်ကို စီစဥ်နေဆဲဖြစ်ပြီး ထပ်မံအသိပေးကြေညာမယ်လို့ မိသားစုနဲ့ နီးစပ်သူတွေကပြောထားပါတယ်။
