အထူးဒေသ (၄) မိုင်းလားမြို့တွင် စည်းကမ်းပျက်ကွက်သည့် မော်တော်ဆိုင်ကယ်နှင့် မော် တော်ယာဉ်များကို တာဝန်ရှိသူများက စစ်ဆေးဖမ်းဆီးလျက်ရှိပြီး သိမ်းဆည်းခံရသည့် ယာဉ်များကို ပြန်လည်ရွေးယူရန်အတွက် အမှုအလိုက် ကျသင့်ဒဏ်ကြေးနှင့် ယာဉ်မောင်းလိုင်စင် စာမေးပွဲ အောင်မြင်မှသာ ပြန်လည်ထုတ်ပေးသည့် စနစ်အား ကျင့်သုံးဆောင်ရွက်လျက်ရှိကြောင်း မြို့ခံများ၏ ပြောကြားချက်အရ သိရသည်။
မြို့တွင်း သွားလာလှုပ်ရှားမှုများတွင် စစ်ဆေးရေးဂိတ်များ ခွဲခြား၍ နေ့စဉ် မကြာခဏ စစ်ဆေးလျက်ရှိရာ မော်တော်ဆိုင်ကယ် မောင်းနှင်သူများအနေဖြင့် ဆိုင်ကယ်စီးဦးထုပ် မဆောင်းခြင်း၊ ယာဉ်နံပါတ်ပြား မတပ်ဆင်ထားခြင်း၊ ဆိုင်ကယ်လိုင်စင်နှင့် ယာဉ်မောင်းလိုင်စင် မရှိခြင်း စသည့် လိုအပ်ချက်များအပေါ် မူတည်၍ ဒဏ်ကြေး ပမာဏ ကွာခြားမှုများ ရှိနေသည်။
စည်းကမ်းပျက်ကွက်မှု မရှိဘဲ ပုံမှန် မော်တော် ဆိုင်ကယ်လိုင်စင် ပြုလုပ်ပါက တရုတ်ယွမ်ငွေ ၆၀၀ ကျော်ခန့်သာ ကျသင့်သော်လည်း ဦးထုပ်မဆောင်းခြင်း၊ နံပါတ်ပြားနှင့် လိုင်စင်များ မရှိခြင်း စသည့် ပြစ်မှုအများအပြား ပါဝင်ပါက ဒဏ်ကြေးနှင့် လိုင်စင်ပြုလုပ်ခ စုစုပေါင်း ယွမ် ၁,၀၀၀ ကျော်မှ ၁,၅၀၀ အထိ ကုန်ကျနိုင်ကြောင်း သိရသည်။
သို့သော် လိုင်စင်နှင့် ဦးထုပ်မှလွဲ၍ အခြားအချက်အလက် ပြည့်စုံသူများအတွက်မူ အနည်းဆုံး ဒဏ်ကြေး ယွမ် ၂၀၀ ခန့်သာ ကျသင့်မည်ဖြစ်သည်။
“ဦးထုပ်လည်း မဆောင်းဘူး၊ နံပါတ်ပြားလည်း မပါဘူး၊ ယာဥ်မောင်းလိုင်စင်လည်း မရှိဘူးဆိုရင် အဲဒါဆိုရင်တော့ အနည်းဆုံး ၁၀၀၀ ကျော် ကျတာပေါ့” ဟု ဒေသခံတစ်ဦးကပြောသည်။
ထို့အပြင် ဖမ်းဆီးခံရသည့် ယာဉ်များကို ပြန်လည်ရွေးယူလိုပါက မိုင်းလား မော်တော် ယာဉ်လိုင်းများ စီမံခန့်ခွဲရေးရုံး (ကညန) ၌ ယာဉ်မောင်းလိုင်စင် စာမေးပွဲနှင့် မောင်းနှင်မှု ကျွမ်းကျင်မှုကို စစ်ဆေးခံရပြီး အောင်မြင်မှသာ ပြန်လည်ထုတ်ပေးလျက်ရှိသည်။
သို့ဖြစ်၍ ဒဏ်ကြေးနှင့် စာမေးပွဲ အခက်အခဲများကြောင့် တန်ဖိုးနည်း သို့မဟုတ် ဟောင်းနွမ်းနေသည့် ဆိုင်ကယ်များကို ပြန်လည်မရွေးယူတော့ဘဲ စွန့်လွှတ်လိုက်ကြသူများလည်း ရှိနေသည်။ ပြန်မရွေးယူသည့် ဆိုင်ကယ်များကို တာဝန်ရှိသူများက တစ်နှစ်လျှင် တစ်ကြီခန့် ရောင်းချလေ့ရှိသည်။
မိုင်းလား ကညန ကွင်းအတွင်း ဖမ်းဆီးထားသည့် ဆိုင်ကယ် ရာချီရှိနေသည်ကိုလည်း သိရသည်။
လက်ရှိတွင် နယ်စပ်ဂိတ်များ ပိတ်ထားသဖြင့် တရုတ်နိုင်ငံဘက်မှ ခရီးသွားများနှင့် ကာစီနိုကစားသူများ ဝင်ရောက်မှု လျော့နည်းသွားသည့်အတွက် မိုင်းလားမြို့ရှိ စီးပွားရေးလုပ်ငန်းများနှင့် ဆိုင်ခန်းအများအပြား ပိတ်သိမ်းထားရပြီး မြို့တွင်း ကုန်သွယ်မှုနှင့် သွားလာမှုများ နည်းပါးကာ ခြောက်ကပ်လျက်ရှိကြောင်း သိရသည်။